ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނަށް (26/2020) އިސްލާހުގެނައުމާ ގުޅޭ.

އާންމު ބޭނުންތަކުގެ ހިދުމަތްތައް ރެގިއުލޭޓުކުރުމަށް ޔޫ.އާރު.އޭ. އިން ކުރަމުންދާ މަސައްކަތްތައް އިތުރަށް ހަރުދަނާކުރުމަށްޓަކައި، ޔޫ.އާރު.އޭ. ޑިރެކްޓަރުންގެ ބޯޑަށް މެންބަރުން އިތުރުކުރުމަށް، ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނަށް (26/2020) ސަރުކާރުގެ ފަރާތުން އިސްލާހުތަކެއް ހުށައަޅުއްވާފައެވެ.

މި އިސްލާހުތަކާ ގުޅޭގޮތުން، ރައްޔިތުންގެ މަޖިލީހުގެ 2026 ވަނަ އަހަރުގެ ދެވަނަ ދައުރުގެ 17 ވަނަ ޖަލްސާ ގައި ވަނީ ބަހުސްކުރައްވާފައެވެ.

އެގޮތުން، ސަރުކާރުގެ ފަރާތުން ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނަށް ހުށައަޅުއްވާފައިވާ 11 އިސްލާހު، ތިރީގައި އެވަނީއެވެ.

1. ބުނެވިދިޔަ ޤާނޫނުގެ 4 ވަނަ މާއްދާގެ (ޓ) އަންނަނިވި ގޮތަށް އިޞްލާޙުކުރުން.

4. (ޓ) މި ޤާނޫނުގެ ދަށުން ނުވަތަ ޢާންމު ބޭނުންތަކުގެ ޚިދުމަތާގުޅޭ ޚާއްޞަ ޤާނޫނެއްގެ ދަށުން ނުވަތަ އެހެންވެސް ޤާނޫނެއްގެ ދަށުން އޮތޯރިޓީން ކުރަންޖެހޭ ކަމަށް ބަޔާންކުރާ އެންމެހައި ކަންކަން ކުރުމާއި، ޢާންމު ބޭނުންތަކުގެ ޚިދުމަތް ދިނުމާގުޅޭ އެނޫންވެސް ކަންކަން، މި ޤާނޫނާއި ޢާންމު ބޭނުންތަކުގެ ޚިދުމަތާގުޅޭ ޚާއްޞަ ޤާނޫނުތަކާ ނުވަތަ އެނޫންވެސް ކަމާބެހޭ ޤާނޫނުތަކާ އެއްގޮތްވާ ގޮތުގެމަތިން، އިންތިޒާމުކުރުން.

2. ބުނެވިދިޔަ ޤާނޫނުގެ 6 ވަނަ މާއްދާގެ (ށ) އަންނަނިވި ގޮތަށް އިޞްލާޙުކުރުން.

6. (ށ) ބޯޑު އެކުލެވިގެންވަނީ، މަޤާމުގެ ހައިސިއްޔަތުން ބޯޑަށް ޢައްޔަންކުރާ އޮތޯރިޓީގެ ޗީފް އެގްޒެކްޓިވްއާއެކު، 7 (ހަތެއް) މެންބަރުންގެ މައްޗަށެވެ.

3. ބުނެވިދިޔަ ޤާނޫނުގެ 7 ވަނަ މާއްދާގެ (ހ) ގެ ފެށޭ ޢިބާރާތް އަންނަނިވި ގޮތަށް އިޞްލާޙުކުރުން.

7. (ހ) އޮތޯރިޓީގެ ޗީފް އެގްޒެކްޓިވް ފިޔަވައި، އޮތޯރިޓީގެ ޑިރެކްޓަރުންގެ ބޯޑުގެ މެންބަރުންގެ ގޮތުގައި ބޯޑަށް ޢައްޔަންކުރަންވާނީ، އަންނަނިވި ދާއިރާތަކުން ފަންނީ ތަޢުލީމާއި ތަޖުރިބާ ލިބިފައިވާ މީހުންގެ ތެރެއިން، އެއިން ކޮންމެ ދާއިރާއަކުން 1 (އެކެއް) މެންބަރެވެ.

4. ބުނެވިދިޔަ ޤާނޫނުގެ 7 ވަނަ މާއްދާގެ (ހ) ގެ (5) ވަނަ ނަންބަރުގެ ފަހަތަށް އަންނަނިވި ފަދައިން ނަންބަރެއް އިތުރުކުރުން.

7. (ހ) (6) ޤާނޫނީ ދާއިރާ.

5. ބުނެވިދިޔަ ޤާނޫނުގެ 7 ވަނަ މާއްދާގެ (ނ) އަންނަނިވި ގޮތަށް އިޞްލާޙުކުރުން.

7. (ނ) އޮތޯރިޓީގެ ޗީފް އެގްޒެކްޓިވް ފިޔަވައި، މި މާއްދާގެ ދަށުން ބޯޑުގެ މެންބަރުންގެ ގޮތުގައި ޢައްޔަންކުރާ ކޮންމެ މެންބަރަކު ޢައްޔަންކުރެވޭނީ 5 (ފަހެއް) އަހަރު ދުވަހުގެ 1 (އެކެއް) ދައުރަށެވެ.

6. ބުނެވިދިޔަ ޤާނޫނުގެ 7 ވަނަ މާއްދާގެ (ނ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

7. (ރ) މި މާއްދާގެ (ނ) ގައި އެފަދައިން ބަޔާންކޮށްފައިވީނަމަވެސް، މި ޤާނޫނުގެ 9 ވަނަ މާއްދާގެ ދަށުން ބޯޑުގެ މެންބަރުކަމުން ވަކިކުރެވޭ މެންބަރުން ފިޔަވައި އެހެން ކޮންމެ މެންބަރަކު، ގިނަވެގެން އިތުރު 1 (އެކެއް) ދައުރަށް ޢައްޔަންކުރެވިދާނެއެވެ.

7. ބުނެވިދިޔަ ޤާނޫނުގެ 8 ވަނަ މާއްދާގެ (ހ) އަންނަނިވި ގޮތަށް އިޞްލާޙުކުރުން.

8. (ހ) ޑިރެކްޓަރުންގެ ބޯޑުގެ ޗެއަރޕަރސަންކަމުގެ މަޤާމަށް، އޮތޯރިޓީގެ ޗީފް އެގްޒެކްޓިވް ފިޔަވައި ބޯޑުގެ މެންބަރުންގެ ތެރެއިން މެންބަރަކު، ރައީސުލްޖުމްހޫރިއްޔާ ޢައްޔަންކުރަންވާނެއެވެ.

8. ބުނެވިދިޔަ ޤާނޫނުގެ 13 ވަނަ މާއްދާގެ (ށ) އަންނަނިވި ގޮތަށް އިޞްލާޙުކުރުން.

13. (ށ) ބޯޑުގެ ޖަލްސާއެއް ބޭއްވޭނީ، ބޯޑުގެ ޗެއަރޕަރސަން ހިމެނޭގޮތުން ބޯޑުގެ ޖުމްލަ މެންބަރުންގެ އަޣުލަބިއްޔަތާ އެއްވަރުގެ ޢަދަދަކަށް މެންބަރުން ހާޒިރުވުމުންނެވެ.

9. ބުނެވިދިޔަ ޤާނޫނުގެ 13 ވަނަ މާއްދާގެ (ރ) އަންނަނިވި ގޮތަށް އިޞްލާޙުކުރުން.

13. (ރ) ބޯޑުގެ ޖުމްލަ މެންބަރުންގެ އަޣުލަބިއްޔަތާ އެއްވަރުގެ ޢަދަދެއްގެ މެންބަރުން ބޯޑުގެ ޖަލްސާއެއް ބޭއްވުމަށް ބޭނުންވާނަމަ، އެކަން ސަބަބު ބަޔާންކޮށް ބޯޑުގެ ޗެއަރޕަރސަނަށް ހުށަހެޅިދާނެއެވެ. އަދި ބޯޑުގެ ޗެއަރޕަރސަނަށް އެ ނޯޓިސް ލިބޭތާ 5 (ފަހެއް) ދުވަހުގެ ތެރޭގައި އެ ނޯޓިހުގައި ހުށަހަޅާފައިވާ ގޮތުގެމަތިން ބޯޑުގެ ޖަލްސާއެއް ބާއްވަންވާނެއެވެ.

10. ބުނެވިދިޔަ ޤާނޫނުގެ 13 ވަނަ މާއްދާގެ (ބ) ގެ ފަހަތަށް އަންނަނިވި ފަދައިން އަކުރެއް އިތުރުކުރުން.

13. (ޅ) ބޯޑުން ނިންމާ އެއްވެސް ކަމެއްގައި ވޯޓުލުމުގެ ޙައްޤު ޗީފް އެގްޒެކްޓިވްއަށް ލިބިގެންނުވެއެވެ.

11. މި ޤާނޫނުގެ 4 ވަނަ މާއްދާއިން ބުނެވިދިޔަ ޤާނޫނުގެ 7 ވަނަ މާއްދާގެ (ހ) އަށް ގެނެވޭ އިޞްލާޙާ ގުޅިގެން، އޮތޯރިޓީގެ ޑިރެކްޓަރުންގެ ބޯޑަށް އިތުރަށް ޢައްޔަންކުރަންޖެހޭ މެންބަރު، މި ޤާނޫނަށް ޢަމަލުކުރަން ފަށާތާ 30 (ތިރީސް) ދުވަހުގެ ތެރޭގައި ޢައްޔަންކުރަންވާނެއެވެ.