ޔުޓިލިޓީ ޚިދުމަތްތަކާ ގުޅޭގޮތުން ހޭލުންތެރިކަން އިތުރުކުރުމަށް ލ. ގަމުގައި މަޢުލޫމާތު ދިނުމުގެ ސެޝަންތަކެއް ބާއްވައިފި

ޔުޓިލިޓީ ޚިދުމަތްތައް ރެގިއުލޭޓްކުރުމުގައި ޔުޓިލިޓީ ރެގިއުލޭޓަރީ އޮތޯރިޓީ (ޔޫ.އާރު.އޭ) ގެ ދައުރާއި މަސްއޫލިއްޔަތުތަކާ ގުޅޭގޮތުން ހޭލުންތެރިކަން އިތުރުކުރުމަށްޓަކައި، އެ އޮތޯރިޓީން ލ. ގަމުގައި މަޢުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފިއެވެ. މި ސެޝަންތަކުގައި ހަކަތަ، ކުނި މެނޭޖްކުރުން، ފެނާއި ނަރުދަމާގެ ދާއިރާތަކަށް ކަނޑައެޅިފައިވާ ރެގިއުލޭޓަރީ އޮނިގަނޑުތަކާ ބެހޭގޮތުން ވަނީ ތަފްޞީލީ މަޢުލޫމާތު ދީފައެވެ.

މީގެ އިތުރުން، އެކި ދާއިރާތަކުން އޮތޯރިޓީން ދޫކުރާ ހުއްދަތަކާއި، ތަންފީޒުކުރަމުންދާ މިންގަނޑުތަކާ ގުޅޭގޮތުން ބައިވެރިންނަށް ވަނީ މަޢުލޫމާތު ދެވިފައެވެ. އަދި ޔުޓިލިޓީ ޚިދުމަތްތަކުގައި ބޭނުންކުރެވިދާނެ ދެމެހެއްޓެނިވި މުހިންމު އުސޫލުތަކާ ގުޅޭގޮތުން ވެސް މި ބައްދަލުވުންތަކުގައި މަޝްވަރާކޮށްފައިވެއެވެ. މި ހަރަކާތުގެ މައިގަނޑު މަޤްޞަދަކީ ރެގިއުލޭޓަރީ ދާއިރާގެ މަސައްކަތްތަކާއި، ވަސީލަތްތައް ދެމެހެއްޓެނިވި ގޮތެއްގައި ބެލެހެއްޓުމާ ގުޅޭގޮތުން އާންމުންގެ ހޭލުންތެރިކަން އިތުރުކުރުމެވެ.